كتبت : علا علي فهمي
تزوير مين يا عم ؟ أستغفر الله العظيم، دول ناس بتوع ربنا، جلاليب بيضه وسبح وذقون طولها 6 متر بيطولوها كل ما يبقوا عايزين يكفروا عن ذنوبهم، مش أي كلام يعني،وإن كان على الميكروباصات إللي بتوصلنا فهما ناس خيرين بطبعم، وإن كان على البطاقات إلي متعلم عليها بـ "نعم" فده عشان يفهمونا نصوت إزاي ؟،وإن كان على قطع النور فده مجرد صدفه، أما بقى التصويت الجماعي فالدين بيقولك "وتعاونوا على البر والتقوى".
بعد نتيجة الإستفتاء والتي جاءت بـ "نعم" بنسبة تفوق الـ 64 %، ومع وجود أكثر من واقعة تزوير بالمرحلة الثانية من الإستفتاء على الدستور المصري، إمتلأت صفحات "الفيس بوك" بالنكات والتعليقات الساخرة، والتي تناقلها الشباب بسرعة البرق، ومن أبرز هذه التعليقات :
ـ إكتب فى الليل الدستور .. وإقطع فى الإستفتا النور ..وإحنا على ظلمك هنثور ..و زى مبارك بكره تغور.
ـ إللي هيقوللي الحكومه قطعت الكهرباء علشان التزوير هقوله لا يا ناصح ..لا يا أبو العريف أبسلوتلي ده إسمه تصويت رومانسي طبقاً لتوجيهات السيد الرئيسو كله بالحب يا ساحبي .
ـ لما الكهربا تقطع عن المنوفية وكفر الشيخ والاسماعيلية وهي محافظات معارضة يبقى نستبعد عامل الصدفة.. ونقول علطووول طفي النور يا بهية ده تزوير مية المية.
ـ كان لازم يقطعوا النور فالمحظورة لا تعرف سوى الظلام.
ـ الإخوان تقريباً عارفين كل حاجه عن الشريعة بإستثناء إن إللي بيزور بيدخل النار !
ـ عظيمة يا مصر يا أرض الـ "نعم"، يا مهد الحضارة الشعب خلاص اتفرم.
ـ نسبة "نعم" في المرحلة الثانية طلعت 104 % بالحافز الرياضي والمستوى الرفيع.
ـ محافظه إسمها "مرسى" مطروح مستنيين منها ايه غير "نعم".
ـ 98% ، 99.5 % ، 100 %، ده إستفتاء أوائل الثانوية العامة مش إستفتاء على الدستور.
ـ مرسى مطروح : لجنة السلوم 100% نعم ..لجنة حتوش 100% نعم ..لجنة البقبق 100% نعم ..لجنة أبو زريبه 100% نعم، حطموا الأرقام القياسية في تزوير الحزب الوطني وكله بما لا يخالف شرع الله.
ـ وقف الخلق جميعاً مندهشون .. كيف ألبس الدستور وحدي؟.
ـ سؤال واحد بس : هو فى حاجة إسمها 100% بعد الثورة ؟!.
ـ الوضع في مصر بعد الثورة إنه في ناس دخلت مطعم سمك، فطلبوا كباب وكفته، فجالهم صينية مسقعة، والخناقة دلوقتي إزاااي رز بلبن ومن غير زبيب.
ـ يعنى اللجان إللى طلعت 100 % نعم فى مطروح، عايزه أقولهم يعني مافيش واحد مسيحى، ومامفيش واحد ليبرالى، ولاحتى في واحد أحول علم على لا بالغلط.
ـ لو كان الرئيس و الحزب الحاكم مش من التيار الإسلامي و حطوا الدستور ده، كانت نفس الشيوخ على نفس القنوات الدينيه هتقول "لا" للدستور، وردهم كان هيكون :"أصله مخالف للشريعه".
ـ مرسي هيموت ويرجع طائر النهضة، وصفوت حجازى هيموت و يبقى مطبلاتى،وعصام العريان هيموت ويرجع البرلمان، والشيخ محمود شعبان هيموت ويجبوله راجل، وأخيراً إحنا هنمووووووت و نرجع ثورتنا.
ساحة النقاش