الصوص الأبيض The basic white sauce

المقادير :

2 بصلة متقطعين صغير جدا.
2 فص ثوم.
1 لتر مرقة ( خضار – سمك – جمبري – فراخ – مرقة اللحم البيضة ) حسب اللي أنتوا هاتعملوا معاه الصوص.
1 لتر كريمة لباني ( هنا أنا بستخدم نوع كريمة أسمه Double Cream أو Whipping Cream أسألوا عليه في كارفور ) دة بيكون نسبة الدهون فيه عالية عشان كدة الصوص بيكون متجانس ومش بيحتاج وقت كتير في التحضير.
2 معلقة زبدة ( هنا أنا أستخدمت زبدة مش زيت لأن الزيت مع الكريمة ساعات بيفصلوا بسبب درجة الحرارة العالية ، والصوص ممكن يبوظ .

طريقة التحضير :

- نحط الزبدة ونسيحها بسيط ونحط البصل والثوم ونطبخهم من غير ما نديهم أى لون ، وبعدين نحط المرقة حسب نوعها ، وهنا نعلي النار على الأخر ونغلي المرقة لحد ما توصل لنص كميتها ( هنا بنعمل حاجة أسمها Reduction ودة معناه بنبخر جزء من المرقة عشان الطعم يزيد في الجزء التاني .
- هندوق المرقة هنلاقي طعم الخضار زاد في المرقة لو كانت مرقة خضار وهكذا لو أي مرقة تانية. ( دة بسبب الغليان المستمر )
- بعد كدة نحط الكريمة ونهدي النار .
- نطبخ كل المكونات على نار هادية لحد ما نوصل لتماسك الصوص.

ملحوظة مهمة :

- نقلب الصوص بأستمرار ونتأكد أن الصوص متحرقش في قاع الحلة.
- أخيرا نحط الصوص في الخلاط وبعدين نصفيه .
- نضيف الملح والفلفل حسب الرغبة

- ليه الصوص دة أسمه Basic White Sauce أو الصوص الأبيض الرئيسي ؟

- لأنه البداية لأنواع كتير من الصوصات بمعنى..

1- يعني لو زودنا على الصوص 100 جرام جبنة بارميزان وهو على النار هادية يبئا " صوص البارميزان "

2- لو زودنا 100 جران جبنة شيدر يبئا (صوص الشيدر).

3- لو زودنا 100 جرام جبنة مدخنة يبئا (صوص الجبنة المدخنة).

4- 50 جرام سالمون مدخن ونسخنه وبعدين نضرب الصوص في الخلاط تاني يبئا (صوص السالمون المدخن).

5- مع مكرونة مع كام قطعة سالمون مدخن تبئا (مكرونة بالسالمون المدخن).

6- نسوي 150 جرام مشروم مع بصلة متقطعة ونحط الصوص عليه يبئا ( صوص المشروم )

7 – نشوح صدرين فراخ فيليه متقطعين قطع صغيرة ، متبلين كويس مع بصلة متقطعة مع فص ثوم مع مشروم وزعتر فريش ونحط الصوص ونستخدمهم يبئا ( صوص فراخ النجرسكو)

8- نقطع لحمة شرائح رفيعة مع مشروم ، مع بصلة ، ونسويهم مع معلقة باربيكا مدخنة والصوص عليهم يبئا (بيف ستروجانوف صوص ) Beef stronganoff sauce

9- نقطع جمبري ، سبيط ، لحمة كابرويا مع بصلة ، فص ثوم ، مع فلفل أحمر وعليهم الصوص يبئا " صوص السي فوود " Sea food Sauce

- ما دام الساس أتعمل صح ، النتيجة النهائية بتاعتكم أنتم ، أعملوا الصوص اللي أنتوا تحبوه ، زودوا جبنة أو نقصوها ، زودوا فراخ ، لحمة أو سمك أو جربوا اي مكونات تانية بس نبدأ الصوص صح!