فراخ على الطريقة المكسيكية بصوص الـ Enchalada

تحضير شيف/ وليد علي

المقادير :

250 فلفل أحمر ( أختاروا درجة الشطة اللي تحبوها )
4 طماطم كاملة ( زي ما هي )
راس ثوم بقشرها.
2 بصل أربع أرباع .
3 معلقة زيت.
1 لمونة خضراء.
3 معلقة باربيكا مدخنة بودر ( دي مهمة جدا أعتقد ممكن تلائوها في كارفور ).

- طريقة التحضير :

- أولا نقطع راس الثوم بالسكينة من ناحية الراس زي ما موضحلكم في الصورة ، وبعدين نرش علية شوية زيت ونلفها في ورق ألومنيوم ( فويل ).

- وبعدين وفي طاسة كبيرة نحمر الزيت ونضع كل المكونات فيها معدا الباربيكا.

- وتوضع في الفرن لمدة 15 دقيقة لغاية ما الفلفل يحمر شوية والبصل والثوم يستوي ، نطلع كل حاجة من الفرن ونخليها تبرد نقشر الفلفل ، ونفك ورق الفويل من على الثوم.

- ملحوظة :

- الثوم لما يستوي بالطريقة دي بيكون مسكر شوية ، وطعمه مش قوي زى العادي ، لدرجة أننا ممكن ناكل راس ثوم كامل وطعمه يعجبنا ( جربوها هتعجبكم جدا ).

- نرجع للخلطة :

- نحط الفلفل المقشر والثوم نقشره وناخد الفصوص ، والطماطم نقشرها إلى جانب البصل ، ونضيف عصير اللمون والباربيكا المدخنة ، نحطهم كلهم في الكبة ونطحنهم ونملح الخلطة .

- بعد كدة نحط الخلطة على الفرخة بنفس الطريقة اللي فاتت ونتبلها لمدة لا تقل عن 3 ساعات .

- لو حبتوها مشوية أو محمرة في الفرن أتبعوا نفس خطوات الشوي أو التحمير في الخلطة الهندية واعملوا جنبها شلطة خضرة وبالهنا والشفا.

- ملحوظة :

- لازم نتأكد ان البصل والثوم استوا لما نطلع الطاسة من الفرن ، الثوم بيكون طري جدا والبصل بيكون لونه بني محروق شوية ، لو مستواش نطلع الفلفل ونسيبهم في الفرن لحد ما يستوا .