كتبت : علا علي فهمي
"المفروض أى مسئول فى البلد دى لما ياخد قرار ينام على ظهره 3 شهور علشان القرار يثبت" ، هذا ما رأه شباب الـ "فيس بوك" بعد سلسلة من القرارات الملغية والتي نعايشها كل يوم بدءاً من صدور الإعلان الدستوري وإلغاءه، ووصولاً إلى رجوع "النائب العام" عن إستقالته، ليقول الشباب " مصر محسودة وما بيعيش لهاش قرار ... لازم نبخرها ".
ومن أبرز تعليقات شباب الفيس بوك :
ـ عاجل : تم العثور على مسئول مصرى لم يتراجع عن قراره و جاري تحنيطه الأن.
ـ ما شابه رئيسه فما ظلم .. هو هيجيبه من بره يعني ؟.
ـ الإخواني مش بس بلحيته، الإخواني برجوعه دايماً في كلمته.
ـ طب ينفع كمان أنا أتراجع وأسحب تصويتي لمرسي في الإنتخابات.
ـ فيلم الموسم "القرارات الملغية" قريباً بجميع دور العرض.
ـ القوى الاسلامية ترحب ... القوى المدنية تدين ... تقرير كل يوم.
ـ إوعى تصدق أي قرار سياسي من أي حد في مصر ، إلا لو في أخره كلمة "قرار نهائي".
ـ كلام الإخوان مدهون بزبدة يطلع عليه النهار يسيح.
ـ كل يوم بنعيش حلقة من الكاميرا الخفية.
ـ يا فرحة ما تمت خدها المرشد وطار.
ـ بالنسبة للإتحاد مع الفلول ... فكرني كده مين أول من جلس مع عمر سليمان والثورة في الميدان ، يا إخوان إذا بليتم فاستتروا.
ـ عاصرى الليمون قرروا التراجع عن موقفهم في الانتخابات .. اشمعني هم يعني !
ـ في ناس بتقول إن الإخوان بيرجعوا في قرارتهم ... أبسلوتلي ده إحنا إلي بنفهم القرار غلط من الأول.
ـ النيزك بتاع نهاية العالم يدلى بتصريحات إنه رجع فى كلامه ومش هيضرب الأرض وبيقول إنه مش إخوان على فكرة.
ـ حقنا نغني للإخوان أصل أنا عندي قرار ساعة يروح وساعة ييجي.
ـ ده ليل قاطع على إن النائب العام من الإخوان ، إخوان ولا مش إخوان يا متعلمين يا بتوع المدارس؟!.
ساحة النقاش