أنا بكره "الضاني" وبقولها لو "هاعاني"!

كتبت : ندى الشلقاني

" عيد الأضحى "، " العيد فرحة" ، " العيد لحمة " ، وكل الناس بتستناه علشان تدبح وتضحي وتاكل اللحمة الضاني لكن في نفس الوقت فيه ناس تانية كتير بتكرهها .

" بكرهها جدا" ، نهى محمود بدأت كلامها بمجرد سؤالها عن اللحمة الضاني " بصراحة رائحة اللحمة بتضايقني جدا وده السبب الرئيسي في كرهي ليها، هذا بالاضافة إلى إنها ثقيلة على المعدة، أو لإننا لم نتعود عليها منذ صغرنا وما بتدخلش البيت إلا في العيد،  وعلشان كدة بقول لأهلي يدبحوها ويوزعوها من " برة برة".

ممدوح ، يقولها بعنف " مستحيل أكلها" ويكمل " أنا مش بحبها خالص ،علشان مش بحب اللحمة السمينة بتتعب معدتي، غير إنها مضرة بصحة الإنسان بسبب الدهون،لإنها بتزود الكوليسترول وبتعمل مشاكل كتير فى الهضم و بيتزود الدهون فى الجسم وأنا أحب أكون رشيق دايما ".

" بموت فيها " ، هكذا قال ماجد وارتسمت معالم البهجة على ملامحه قائلا" أنا بعشق اللحمة الضاني ، وهي بالنسبة لي رقم واحد في أنواع اللحوم، وبكون في قمة سعادتي في عيد الاضحي علشان أكلها كتير، على الرغم من إني باكلها على مدار السنة إلا إنها في العيد لها طعم تاني خالص".

" هو في أحسن من اللحمة الضاني " ، هذا رأي أحمد وأكمل " على الرغم من أن إنها دسمة جدا إلا إنها مفيدة جدا وأحلى حاجة " الشوي" اللي بيتجمع عليه كل أفراد الأسرة، ورائحته الذكية الجميلة التي تفتح الشهية ، فأنا أنتظر عيد الأضحي لكي أشبع منها ".

أما محمد فيقول " أنا الوحيد من بين أفراد أسرتي الذي يعشق اللحمة الضاني، أما بقية أفراد الاسرة لايحبونها إطلاقا ، وهذا الأمر يسبب لي إحباط كبير، لأن أكلها بيحب " اللمة " ، ومع ذلك فأنا أكلها وهم يأكلوا الأنواع التي يحبونها ، فليس لهم أي تأثير علي ، فأنا لا أستطيع أن أقضي  عيد الاضحى بدون الضاني ".